អង្គរ ជេនេរ៉ល អុិនសួរេន និង Cambodia Re ពង្រឹងភាពជាដៃគូ ដើម្បីអភិវឌ្ឍវិស័យធានារ៉ាប់រងកម្ពុជា

អង្គរ ជេនេរ៉ល អុិនសួរេន ម.ក និងក្រុមហ៊ុនធានារ៉ាប់រងបន្តកម្ពុជា “កម្ពុជារី” (Cambodian Reinsurance Company – Cambodia Re) បានចុះហត្ថលេខាជាផ្លូវការលើ សន្ធិសញ្ញាធានារ៉ាប់រងបន្ត (Reinsurance Treaty) ដ៏ទូលំទូលាយ ដែលជាសមិទ្ធផលដ៏សំខាន់មួយក្នុងការពង្រឹងសមត្ថភាពចែករំលែកហានិភ័យ និងគាំទ្រដល់ការអភិវឌ្ឍជាបន្តបន្ទាប់នៃ វិស័យធានារ៉ាប់រងនៅកម្ពុជា។

ភាពជាដៃគូយុទ្ធសាស្ត្រនេះ មានគោលបំណងបង្កើនសមត្ថភាពក្នុងការធានាទទួលហានិភ័យ ពង្រឹងការគ្រប់គ្រងហានិភ័យក្នុងស្រុក និងគាំទ្រកំណើនប្រកបដោយចីរភាពនៃ ទីផ្សារធានារ៉ាប់រងកម្ពុជា ស្របតាមគោលដៅអភិវឌ្ឍន៍ហិរញ្ញវត្ថុរបស់ប្រទេស។​ សន្ធិសញ្ញានេះត្រូវបានចុះហត្ថលេខាក្នុងពិធីជួបជុំថ្នាក់ដឹកនាំដែលរៀបចំឡើងនៅរាជធានីភ្នំពេញ ដោយមានការចូលរួមពីថ្នាក់ដឹកនាំជាន់ខ្ពស់ ដៃគូយុទ្ធសាស្ត្រ និងអ្នកជំនាញបច្ចេកទេសពីស្ថាប័នទាំងពីរ ដើម្បីបើកជំពូកថ្មីនៃកិច្ចសហការ ការគ្រប់គ្រងហានិភ័យ និងការអភិវឌ្ឍទីផ្សារធានារ៉ាប់រងនៅកម្ពុជា។

ភាពជាដៃគូដែលផ្អែកលើទំនុកចិត្ត និងការរីកចម្រើនប្រកបដោយចីរភាព

ក្នុងនាមជាក្រុមហ៊ុនធានារ៉ាប់រងបន្តកម្រិតថ្នាក់ជាតិរបស់កម្ពុជា Cambodia Re មានតួនាទីសំខាន់ក្នុងការពង្រឹងសមត្ថភាពធានារ៉ាប់រងបន្តក្នុងស្រុក និងគាំទ្រដល់ការគ្រប់គ្រងហានិភ័យប្រកបដោយប្រសិទ្ធភាពនៅក្នុងទីផ្សារធានារ៉ាប់រងក្នុងប្រទេស។

តាមរយៈសន្ធិសញ្ញាធានារ៉ាប់រងបន្តនេះ អង្គរ ជេនេរ៉ល អុិនសួរេន នឹងប្រើប្រាស់ជំនាញទីផ្សារក្នុងស្រុក និងសមត្ថភាពធានារ៉ាប់រងបន្តរបស់ Cambodia Re ដើម្បីគាំទ្រដល់ការរីកចម្រើននៃផលប័ត្រធានារ៉ាប់រងរបស់ខ្លួន ដែលរួមមានអតិថិជនបុគ្គល អាជីវកម្ម ទ្រព្យសម្បត្តិ និងវិស័យធានារ៉ាប់រងដែលកំពុងរីកចម្រើនផ្សេងៗទៀត។ ភាពជាដៃគូនេះនឹងផ្តល់សមត្ថភាពបន្ថែមដល់ អង្គរ ជេនេរ៉ល អុិនសួរេន ក្នុងការគ្រប់គ្រងហានិភ័យដែលកាន់តែមានភាពចម្រុះ និងស្មុគស្មាញ ខណៈដែលនៅតែរក្សាបាននូវការអនុវត្តការធានាទទួលហានិភ័យ និងការគ្រប់គ្រងហានិភ័យប្រកបដោយការប្រុងប្រយ័ត្ន។

គោលបំណងយុទ្ធសាស្ត្រសំខាន់ៗនៃសន្ធិសញ្ញាធានារ៉ាប់រងបន្ត

ភាពជាដៃគូនេះផ្តោតលើចំណុចយុទ្ធសាស្ត្រសំខាន់ៗមួយចំនួន៖

• បង្កើនសមត្ថភាពធានាទទួលហានិភ័យ: ផ្តល់សមត្ថភាពកាន់តែខ្ពស់ដល់ អង្គរ ជេនេរ៉ល អុិនសួរេន ក្នុងការធានាទទួលហានិភ័យពាណិជ្ជកម្ម និងទ្រព្យសម្បត្តិដែលមានទំហំធំ និងស្មុគស្មាញនៅកម្ពុជា។
• ពង្រឹងការគ្រប់គ្រងហានិភ័យ: គាំទ្រដល់ការចែករំលែកហានិភ័យប្រកបដោយប្រសិទ្ធភាព និងការគ្រប់គ្រងការប្រឈមនឹងហានិភ័យធានារ៉ាប់រងក្នុងស្រុកដោយមានការប្រុងប្រយ័ត្ន។
• អភិវឌ្ឍទីផ្សារក្នុងស្រុក: ចូលរួមពង្រឹងប្រព័ន្ធអេកូឡូស៊ីធានារ៉ាប់រង និងធានារ៉ាប់រងបន្តក្នុងប្រទេសកម្ពុជា។
• ផ្លាស់ប្តូរចំណេះដឹង និងជំនាញបច្ចេកទេស: ជំរុញកិច្ចសហការលើការអភិវឌ្ឍផលិតផល ការវាយតម្លៃហានិភ័យ ការអនុវត្តការធានាទទួលហានិភ័យ និងការចែករំលែកជំនាញបច្ចេកទេស។
• ពង្រីកដំណោះស្រាយធានារ៉ាប់រង: បង្កើតមូលដ្ឋានធានារ៉ាប់រងបន្តកាន់តែរឹងមាំ ដើម្បីឱ្យ អង្គរ ជេនេរ៉ល អុិនសួរេន អាចអភិវឌ្ឍ និងផ្តល់ជូនដំណោះស្រាយធានារ៉ាប់រងកាន់តែទូលំទូលាយសម្រាប់អតិថិជន និងអាជីវកម្មនៅកម្ពុជា។

ទស្សនៈរបស់ថ្នាក់ដឹកនាំ

លោក Zhang Yuan Zhao នាយកយុទ្ធសាស្ត្រ (Chief Strategy Officer) និងជាតំណាងរបស់អ្នកឧកញ៉ា លី សុភ័ក្ត ប្រធានក្រុមប្រឹក្សាភិបាល អង្គរ ជេនេរ៉ល អុិនសួរេន បានមានប្រសាសន៍ថា៖

«សន្ធិសញ្ញានេះតំណាងឱ្យការស្របគ្នានៃចក្ខុវិស័យយុទ្ធសាស្ត្រដ៏សំខាន់មួយ។ ការចាប់ដៃគូជាមួយ Cambodia Re អនុញ្ញាតឱ្យយើងពង្រឹងសមត្ថភាពហិរញ្ញវត្ថុ និងប្រើប្រាស់ជំនាញស៊ីជម្រៅលើហានិភ័យក្នុងស្រុក។ ជាមួយគ្នា យើងកំពុងកសាងបណ្តាញការការពារដែលមានភាពជឿជាក់ ភាពរឹងមាំ និងចក្ខុវិស័យទៅមុខកាន់តែប្រសើរ ដើម្បីផ្តល់អត្ថប្រយោជន៍ដល់អាជីវកម្ម និងគ្រួសារកម្ពុជាទាំងមូល»។

លោក ហ៊ុយ វ៉ាថារ៉ូ អគ្គនាយកនៃ ក្រុមហ៊ុនធានារ៉ាប់រងបន្តកម្ពុជា “កម្ពុជារី”  បានមានប្រសាសន៍បន្ថែមថា៖

«បេសកកម្មរបស់យើងតែងតែផ្តោតលើការបង្កើតប្រព័ន្ធអេកូឡូស៊ីដែលមានសុខភាពល្អ និងមានកិច្ចសហការល្អ ដើម្បីគាំទ្រដល់ការអភិវឌ្ឍប្រកបដោយចីរភាពនៃទីផ្សារធានារ៉ាប់រងកម្ពុជា។ តាមរយៈសន្ធិសញ្ញានេះ ជាមួយដៃគូដែលមានភាពសកម្មដូចជា អង្គរ ជេនេរ៉ល អុិនសួរេន យើងកាន់តែពង្រឹងការប្តេជ្ញាចិត្តរបស់យើងក្នុងការពង្រឹងសមត្ថភាពទីផ្សារក្នុងស្រុក និងគាំទ្រដល់ការអភិវឌ្ឍជាបន្តបន្ទាប់នៃវិស័យធានារ៉ាប់រងកម្ពុជា»។

ពង្រឹងអនាគតនៃវិស័យធានារ៉ាប់រងនៅកម្ពុជា

ភាពជាដៃគូរវាង អង្គរ ជេនេរ៉ល អុិនសួរេន និងក្រុមហ៊ុនធានារ៉ាប់រងបន្តកម្ពុជា “កម្ពុជារី” គឺជាជំហានដ៏មានសារៈសំខាន់មួយក្នុងការពង្រឹងប្រព័ន្ធអេកូឡូស៊ីធានារ៉ាប់រង និងធានារ៉ាប់រងបន្តក្នុងស្រុករបស់កម្ពុជា។​ តាមរយៈការរួមបញ្ចូលចំណេះដឹងអំពីទីផ្សារក្នុងស្រុក ជំនាញធានាទទួលហានិភ័យប្រកបដោយវិជ្ជាជីវៈ និងសមត្ថភាពធានារ៉ាប់រងបន្តដែលកាន់តែរឹងមាំ ស្ថាប័នទាំងពីរមានគោលបំណងរួមគ្នាគាំទ្រដល់ទីផ្សារធានារ៉ាប់រងដែលមានភាពធន់ និងអាចឆ្លើយតបបានកាន់តែប្រសើរទៅនឹងតម្រូវការដែលកំពុងវិវឌ្ឍរបស់បុគ្គល អាជីវកម្ម និងសហគមន៍នៅកម្ពុជា។

ខណៈវិស័យធានារ៉ាប់រងកម្ពុជាបន្តមានការរីកចម្រើន អង្គរ ជេនេរ៉ល អុិនសួរេន នៅតែប្តេជ្ញាចិត្តក្នុងការអភិវឌ្ឍដំណោះស្រាយធានារ៉ាប់រងដែលមានភាពជឿជាក់ និងផ្តោតលើអតិថិជន ព្រមទាំងធ្វើការជាមួយដៃគូឧស្សាហកម្មដែលមានភាពជឿជាក់ ដើម្បីពង្រឹងការការពារហានិភ័យ និងចូលរួមចំណែកដល់ការអភិវឌ្ឍសេដ្ឋកិច្ចកម្ពុជាក្នុងរយៈពេលវែង។

អំពី អង្គរ ជេនេរ៉ល អុិនសួរេន ម.ក

អង្គរ ជេនេរ៉ល អុិនសួរេន ម.ក គឺជាក្រុមហ៊ុនធានារ៉ាប់រងទូទៅដែលមានម្ចាស់កម្មសិទ្ធិជាជនជាតិខ្មែរ និងប្រតិបត្តិការនៅព្រះរាជាណាចក្រកម្ពុជា ដោយប្តេជ្ញាផ្តល់ដំណោះស្រាយធានារ៉ាប់រងដែលមានភាពជឿជាក់ សម្រាប់បុគ្គល គ្រួសារ អាជីវកម្ម និងអតិថិជនសាជីវកម្ម។

ដោយឈរលើការសន្យារបស់ម៉ាក «Built on Trust» និងគុណតម្លៃស្នូល ទំនុកចិត្ត សេវាកម្ម និងភាពជឿជាក់ (Trust, Service, and Reliability) ក្រុមហ៊ុនផ្តល់ដំណោះស្រាយធានារ៉ាប់រងដែលផ្តោតលើអតិថិជន ដោយមានការធានាទទួលហានិភ័យប្រកបដោយវិជ្ជាជីវៈ សេវាទាមទារសំណងដែលឆ្លើយតបបានល្អ និងការគ្រប់គ្រងហានិភ័យប្រកបដោយប្រសិទ្ធភាព។

អង្គរ ជេនេរ៉ល អុិនសួរេន បន្តចូលរួមចំណែកក្នុងការអភិវឌ្ឍវិស័យធានារ៉ាប់រងកម្ពុជា តាមរយៈនវានុវត្តន៍ ភាពជាដៃគូយុទ្ធសាស្ត្រ និងការប្តេជ្ញាចិត្តក្នុងការផ្តល់ ការការពារពិតប្រាកដ សេវាកម្មពិតប្រាកដ និងសន្តិភាពផ្លូវចិត្តពិតប្រាកដ (Real Protection, Real Service, and Real Peace of Mind)។

អំពីក្រុមហ៊ុនធានារ៉ាប់រងបន្តកម្ពុជា “កម្ពុជារី” (Cambodia Re)

ក្រុមហ៊ុនធានារ៉ាប់រងបន្តកម្ពុជា “កម្ពុជារី”  (Cambodian Reinsurance Company – Cambodia Re) ត្រូវបានបង្កើតឡើងក្នុងឆ្នាំ ២០០២ ក្រោមការគ្រប់គ្រងរបស់ ក្រសួងសេដ្ឋកិច្ច និងហិរញ្ញវត្ថុ និងមានតួនាទីជាក្រុមហ៊ុនធានារ៉ាប់រងបន្តជាតិរបស់កម្ពុជា។

ក្រុមហ៊ុនធានារ៉ាប់រងបន្តកម្ពុជា “កម្ពុជារី”  ផ្តល់សេវាធានារ៉ាប់រងបន្តប្រកបដោយវិជ្ជាជីវៈ សម្រាប់វិស័យធានារ៉ាប់រងទូទៅ និងធានារ៉ាប់រងអាយុជីវិត ព្រមទាំងមានតួនាទីសំខាន់ក្នុងការគាំទ្រការគ្រប់គ្រងហានិភ័យក្នុងស្រុក ពង្រឹងសមត្ថភាពធានារ៉ាប់រងបន្តក្នុងប្រទេស អភិវឌ្ឍជំនាញបច្ចេកទេស និងចូលរួមចំណែកក្នុងការពង្រឹងភាពធន់នៃវិស័យហិរញ្ញវត្ថុ និងធានារ៉ាប់រងរបស់កម្ពុជា។